Haugaland og Sunnhordland tingrett

Sørhauggata 80, 5522 Haugesund, Hjemmekontor ikke mulig

Om jobben

Stillingstittel

Dommarfullmektig

Type ansettelse

Engasjement, heltid 100%

Arbeidsspråk

Norsk

Antall stillinger

1

Søk senest søndag 14. september

Om stillingen

Vil du ha ei stilling der du får bryne deg på eit stort spekter av juridiske oppgåver samstundes som du har ei viktig samfunnsrolle?

Her vil du raskt få oppgåver innan heile breidda av det juridiske fagfeltet. Nokre dagar behandlar du straffesaker med meddommarar eller tek stilling til spørsmål om varetektsfengsling. Andre dagar brukar du til å førebu og avgjere tvistesaker om alt frå arbeidskonflikter til utlendingsrett og kontraktsrett.

Her er ingen dag lik den førre! Kvar dag møter du også ulike livshistoriar og skjebner som garantert vil gjere inntrykk på deg. Du får ta i bruk verktøya og metodane du lærte under jusstudiet, og utviklar deg kontinuerleg både som menneske og jurist.

Som dommarfullmektig arbeider du sjølvstendig gjennom heile prosessen: frå å førebu sakene til å leie rettsmøta og skrive avgjerdene. Men du blir også del av eit fellesskap med flinke og hyggjelege kollegaer som samarbeidar, støttar og deler kompetanse med kvarandre. Det er alltid ei open dør når du treng det. I tillegg får du ein fadder som følgjer deg opp fagleg og sosialt.

Arbeidskvardagen er både hektisk og utfordrande. For å trivast i jobben som dommarfullmektig må du kunne setje deg raskt inn i ulike problemstillingar, ta kloke avgjerder og halde tidsrammene. Har du også hjartet på rett plass og ein grunnleggjande respekt for menneske i alle livssituasjonar, er kanskje du nettopp den vi ser etter?

Stillinga som dommarfullmektig er tidsavgrensa til to år, med høve til forlenging i eitt år, jf. domstollova § 55 g.

Arbeidsoppgåver

Dei viktigaste arbeidsoppgåvene dine er

• å planleggje og gjennomføre sakene på ein effektiv måte
• å leie rettsmøte
• å sikre at avgjerdene får god kvalitet
• å bidra til gode fagmiljø gjennom deling av kunnskap og erfaringar

Kven er du?

For å bli dommarfullmektig må du ha følgjande kompetanse:

• juridisk embetseksamen/mastergrad i rettsvitskap med gode resultat
• relevant erfaring frå domstol, politiet eller advokatbransjen, mv.
• gode munnlege og skriftlege norskkunnskapar
• god skriftleg og munnleg framstillingsevne, med eit språk alle kan forstå
• evne til å sjå moglegheitene digitale verktøy gir for å effektivisere arbeidsprosessar

Du må vere norsk statsborgar. Uttømmande politiattest vil bli innhenta.

Personlege eigenskapar

Det er viktig at du kjenner deg igjen i fleire av følgjande eigenskapar:

• Du har høg etisk standard og integritet.
• Du er fagleg dyktig, set deg raskt inn i komplekse problemstillingar og har god vurderingsevne.
• Du arbeider sjølvstendig og er i stand til å ta vanskelege avgjerder.
• Du leverer kvalitet, er effektiv og bidreg til god framdrift i sakene.
• Du kommuniserer godt med partar og aktørar.
• Du samarbeidar godt med andre og bidreg til eit godt arbeidsmiljø.

Det vil bli lagt vekt på om du er personleg eigna for stillinga.

Vi tilbyr

Vi tilbyr

• varierte og utfordrande arbeidsoppgåver på ein arbeidsplass med eit viktig samfunnsoppdrag
• godt arbeidsmiljø med hyggelege og kompetente kollegaer
• ein eigen mentor i domstolen
• fleksible ordningar for fri, avspasering og høve til trening i arbeidstida
• moglegheit for god referanse for vidare karriere
• eit sjølvstendig og meiningsfylt arbeid og stort rom for fagleg utvikling
• introduksjonsprogram og deltaking på relevante kompetansetiltak
• gode pensjons-, forsikrings- og låneordningar i Statens pensjonskasse

Tilsetjingsvilkår etter hovudtariffavtalen i staten, med startlønn frå ca. kr 560 000,- per år. Lønsutvikling etter tenestetid og avtaleverk.

Mangfald i Noregs domstolar

Det er viktig at dei tilsette i norske domstolar representerer eit godt mangfald av menneske med ulik bakgrunn og erfaring. Vi har i dag eit rikt og fleirkulturelt samfunn. Norges domstolar ønskjer difor å rekruttere fleire medarbeidarar med fleirkulturell bakgrunn og erfaring. Dette vil gje domstolane viktig kunnskap i utføringa av samfunnsoppdraget.

Mangfald er ein styrke, og vi vil leggje til rette for tilsette med ulike behov. Les meir om moglegheita for positiv særbehandling på https://arbeidsgiver.dfo.no/positivsaerbehandling.

Kontaktperson for stillingen

Frank Schmidt

domstolleiar

+4752701400

Om bedriften

Domstolane er den tredje statsmakta. Noreg har 50 domstolar med om lag 2000 medarbeidarar. Som den viktigaste konfliktløysaren i samfunnet er domstolane avhengige av tillit. Det inneber at verksemda må innfri krav og forventningar frå samfunnet.

Domstolane er avgjerande for at vi har eit trygt og godt samfunn basert på tillit og rettstryggleik. Alle skal ha tillit til og respektere avgjerdene våre, uavhengig av utfall. Hos oss kan kvar og ein få avgjort si sak, sett strek og kome seg vidare.

Med rolla vår følgjer eit stort ansvar. Avgjerdene våre er uavhengige og upåverka av styresmakter eller press frå andre miljø.

Haugaland og Sunnhordland tingrett rett er lokalisert i Haugesund med rettsstader i Haugesund og på Stord, Domstolen er leidd av ein domstolleiar og har i tillegg ein nestleiar, ein administrasjonssjef, 8 dommarar, 3 dommarfullmektigar, og 16 saksbehandlarar. Du vil med andre ord få eit tverrfagleg arbeidsmiljø med svært kompetente kollegaer som alle deler eit engasjement for samfunnsoppdraget vårt. Domstolen omfattar kommunane Bokn, Etne, Haugesund, Karmøy, Sauda, Suldal, Tysvær, Utsira, Vindafjord, Bømlo, Fitjar, Kvinnherad, Stord, Sveio og Tysnes

Personopplysningar i søknaden til stillinga og i CV-en vil bli handterte i samsvar med lov om behandling av personopplysningar. Du kan lese meir om personvern på domstol.no. Her finn du også generell informasjon om domstolane.

Vi utarbeider offentleg søkjarliste og viser til offentleglova § 25 andre ledd for høvet til å bli utelaten frå denne lista.

Sektor

Offentlig

Nettsted

http://www.domstol.no/haugaland

Annonsedata

Stillingsnummer

75af8fcb-59fb-4141-a914-a00ec574f723

Hentet fra

jobbnorge

Referanse

10260502